Spánn er kominn í 8-liða úrslit eftir sigur á Króatíu í framlengdum leik í 16-liða úrslitum í dag. Leikið var á Parken í Kaupmannahöfn.

Spánverjar stjórnuðu leiknum fyrstu 20 mínúturnar og virkuðu til alls líklegir. Á 20. mínútu gerði Unai Simon, markvörður þeirra, sig þó sekan um skelfileg mistök þegar hann missi sendingu Pedri til baka fram hjá sér. Inn í markið fór boltinn og Króatar komnir yfir.

Það slokknaði aðeins á Spánverjunum fyrstu mínúturnar eftir markið en Pablo Sarabia náði þó að jafna metin á 38. mínútu. Staðan í hálfleik var 1-1.

Leikmenn spænska liðsins mættu sterkari út í seinni hálfleikinn. Á 57. mínútu kom Cesar Azpilicueta þeim yfir með flottu skallamarki.

Ferran Torres virtist svo vera að gera út um leikinn um 20 mínútur síðar þegar hann skoraði eftir að króatísku varnarmennirnir höfðu gleymt sér. Staðan 3-1.

Mislav Orsic minnkaði muninn fyrir Króata á 85. mínútu. Það gerði lokamínúturnar afar spennandi.

Það var svo á annari mínútu uppbótartíma sem Mario Pasalic skallaði boltann í netið og jafnaði metin. Staðan eftir venjulegan leiktíma 3-3 og því þurfti að grípa til framlengingar.

Þar höfðu Spánverjar betur. Alvaro Morata skoraði laglegt mark á 100. mínútu og Mikel Oyarzabal gerði út um leikinn með marki þremur mínútum síðar. Lokatölur 5-3 eftir framlengdan leik.

Spánn mætir Frakklandi eða Sviss í 8-liða úrslitum. Króatar fara heim.