Það var hasar í Lengjudeild karla í gær og í Grindavík sauð allt upp úr þegar Selfyssingar mættu í heimsókn. Leiknum lauk með 1-0 sigri heimamanna.

Á 91 mínútu urðu læti í boðvangi Grindavíkur en þangað mætti Óskar Valberg Arilíusson úr starfsliði Selfoss. Grindvíkingar voru óhressir með málið. Sögur um að Óskar hafi gefið Sigurbirni Hreiðarssyni, þjálfara Grindavíkur bylmingsolnbogaskot eru hins vegar ekki sannar.

Málið verður betur skoðað í markaþætti Lengjudeildarinnar á Hringbraut klukkan 20:00 á mánudag.

„Upp úr sauð á lokamínútum leiks Grindavíkur og Selfoss þegar liðsstjóri Selfyssingi fór úr boðvangi þeirra, inn í boðvang Grindvíkinga og slær boltann úr höndum boltastráks sem honum þótti ekki vera nógu röskur við að koma boltanum í leik og sagði hann vera að tefja. Við þennan yfirgang Selfyssingsins kom til orðaskipta milli liðsstjórans og bekks Grindvíkinga sem urðu til þess að liðsstjórinn gaf Sigurbirni Hreiðarssyni, þjálfara Grindvíkinga, bylmingsolnbogaskot. Við það reiddist einn úr starfsliði Grindvíkinga og fékk hann að líta rauða spjaldið eftir þessi viðskipti þótt upphafsaðilinn slyppi einungis með gult spjald,“ segir í umfjöllun á vef Víkurfrétta.

Sigurbjörn sjálfur gerir lítið úr málinu við Víkurfréttir og segir. „Þetta gerist bara í hita leiksins. Hann veður inn á boðvang okkar, sem hann á auðvitað ekki að gera, og þar eru allir heitir. Hann er heitur, við erum heitir og það kemur til smá stympinga. Við ræddum saman eftir leik, kláruðum málið okkar á milli og allir sáttir. Þessi maður er alger öðlingur og þetta er bara eitt af því sem gerist í æsingnum, báðir aðilar misstu sig aðeins en ekkert alvarlegt,“ sagði Sigurbjörn í samtali við Víkurfréttir.

Haukur Guðberg Einarsson úr starfsliði Grindavíkur fékk rautt spjald fyrir að ýta við Óskari. Margir telja að einnig hefði átt að reka Óskar af velli.

Erlendur Eiríksson var dómari leiksins. „Hef alltaf verið fan Erlendar en þarna gerir hann mistök, auðvitað átti að henda Selfyssingnum í burtu með rautt líka. Hann á upptökin á öllu, yfirgefur boðvang, fer í boltastrákinn, fer í Bjössa og ýtir svo á liðstjóra Grindavíkur,“ skrifar Ásgrímur Einarsson formaður knattspyrnudeildar Fram um málið.

Málið verður betur skoðað í markaþætti Lengjudeildarinnar á Hringbraut klukkan 20:00 á mánudag.

Umrætt atvik í Grindavík má sjá hér að neðan.