Undanfarinn sólarhring hefur orðrómur um hrottalega hópnauðgun úti á Gróttu farið á flug á samfélagsmiðlum. Um er að ræða upptöku af konu sem að fer yfir hina meintu atburðarrás og er á þá leið að sex rúmenskir karlmenn í tveimur bílum hafi numið á brott unga menntaskólastúlku í miðbænum, keyrt með hana út á Gróttu þar sem þeir hafi allir nauðgað henni. Fórnarlambið hafi svo við illan leik náð að kasta sér út úr bílnum.
DV hefur borist ábendingar um málið úr fjölmörgum áttum síðastliðinn sólarhring ásamt ásökunum um að verið sé að þagga málið niður.
Í samtali við DV segir Ævar Pálmi Pálmason, yfirmaður kynferðsbrotadeildar lögreglunnar á höfuðborgarsvæðinu, að lögreglan kannist ekki við að slíkt mál sé inni á borði lögreglu.
„Við höfum fengið ótal fyrirspurnir og ábendingar í dag og það er ekkert mál sem passar við þessar lýsingar sem þarna koma fram,“ segir Ævar Pálmi Pálmason. Hann vísar því á bug að slíkt mál sé í rannsókn hjá lögreglunni og hvað þá heldur að mál sem tengist ítrekuðum nauðgunum hóps eða einstaklings sé í rannsókn. „Þá væri sá einstaklingur eða einstaklingar í gæsluvarðhaldi,“ segir Ævar Pálmi.
Lára þekkir til stelpu sem þekkir til þessarar stelpu sem var edrú og hefur aldrei drukkið, er alltaf á bíl og er að útskrifast úr menntaskóla núna. Hún var með vinum sínum á laugardagskvöldi klukkan 9 að labba með sínum vinum í bílinn sinn. Þau eru hópur saman að labba í bílinn hennar og hún stoppar við einhvern glugga, þar er svo flottur kjóll og hún hugsar „ég get verið í honum í útskriftinni minni.“ Hún tekur mynd og áður en hún veit af eru þrír menn komnir að henni, taka um munninn á henni og draga hana inn í bíl þar sem fjórði er að keyra.
Á meðan eru vinir hennar bara að labba upp. Bíllinn keyrir burtu og fyrir aftan þau er annar bíll þar sem eru tveir, þetta er tveir bílar saman þannig þetta eru sex menn. Þeir keyra með hana út á Gróttu, nauðga henni allir þar og hún er bara bláedrú, hefur aldrei drukkið og er bara að náttúrulega hugsa með sér „þeir eru bara að fara að drepa mig“ og reynir samt bara að muna, horfa á andlitin á þeim og eitthvað. Svo fara þeir, eru með hana ennþá í bílnum, og keyra í burtu og hún er bara „okei hvert eru þeir að fara með mig?“ og hún hoppar út úr bílnum á ferð. Það var bara annað hvort það eða ég veit ekki hvað skilurðu? Og það er eitthvað fólk sem sér hana og hringir á sjúkrabíl. Hún er náttúrulega bara vel sködduð eftir að hafa dottið úr bílnum og náttúrulega bara andlega eftir ógeðin.
En þá var hún svo klár að hún tók eitt bílnúmerið sem þessir menn voru með niður og löggan finnur þá. Heyrðu, þá eru þetta einhverjir gaurar sem eru Rúmenar, einhverjir menn, og þetta er í þriðja skipti bara á þessum mánuði sem þeir gera þetta við einhverja stelpu. Það sást á myndavélum hjá Sæta Svíninu að þeir voru bara að keyra hring eftir hring, þessir báðir bílar. Þannig þeir eru bara að reyna að finna eitthvað fórnarlamb sem er að labba eitt, þótt að vinir þeirra séu bara rétt á undan. Þetta er bara ógeð þannig endilega látið alla vita og stelpur, aldrei labba einar neitt, sama hvort þið séuð edrú eða ekki.
