Starfsmenn Samherja sóttu gögn úr persónulegu Dropbox-i Jóhannesar Stefánssonar uppljóstrara til að reyna að staðfesta þá mynd sem fyrirtækið hefur reynt að draga upp af Jóhannesi. Stundin greinir frá. 

Gögnum um samskipti „skæruliðadeildar“ Samherja var lekið til Stundarinnar og Kjarnans á dögunum og hafa báðir fjölmiðlar birt fréttir úr þeim seinustu daga. Gögnunum var stolið af þriðja aðila úr síma Páls Steingrímssonar, starfsmanns Samherja, og áframsend á miðlana.

Samkvæmt Stundinni áttu gögnin úr Dropbox-i Jóhannesar að sýna fram á að hann væri orðinn „óstýrlátur starfsmaður“ stuttu áður en hann hætti hjá fyrirtækinu og að hann beri alla ábyrgð á starfsháttum fyrirtækisins í Namibíu. Fram kemur að gögnin sem fyrirtækið stal hafi verið komið til lögreglu.

Ekki kemur fram hvað stendur nákvæmlega í þessum gögnum sem Samherji stal en Anna Bryndís Baldvins McClure, lögmaður Samherja, talar mikið um gögnin í samantekt um Samherja-málið sem hún skrifaði í febrúar.