Tveir menn létust á laugardaginn þegar Tesla bifreið, sem þeir voru í, lenti á tré. Þetta gerðist norðan við Houston í Texas í Bandaríkjunum. Lögreglan telur að sjálfstýring bifreiðarinnar hafi verið á þegar slysið átti sér stað.

The Wall Street Journal er meðal þeirra fjölmiðla sem hafa fjallað um slysið. Fram kemur að viðbragðsaðilar hafi verið sendir á vettvang eftir að tilkynnt var um sprengingu í skógi. Það reyndist vera Tesla sem hafði lent á tré.

Það tók fjórar klukkustundir að slökkva eldinn sem blossaði upp við ákeyrsluna.

Mennirnir tveir sátu annars vegar í aftursæti og hins vegar í farþegasætinu að sögn lögreglunnar sem segist vera 99,9% viss um þetta.

Talsmaður Tesla sagði að það sé öruggara að keyra í Tesla með sjálfstýringuna á en án en hún sé aðstoðartæki við aksturinn og komi ekki í stað ökumanns.