Miðað við þann hraða sem nú er á bólusetningum gegn kórónuveirunni í Bandaríkjunum og stefnu stjórnvalda á að bæta enn frekar við hann þá færist landið sífellt nær hjarðónæmi en þá verða nægilega margir ónæmir fyrir veirunni til að hún hætti að breiðast út.  Sérfræðingur CNN segir að miðað við gögn frá alríkisstjórninni sé líklegt að hjarðónæmi náist í sumar.

Joe Biden, forseti, sagði í síðustu viku að nóg verði af bóluefni fyrri alla fullorðna fyrir lok maí. Núna eru um tvær milljónir bólusettar á sólarhring miðað við nýjustu tölur frá smitsjúkdómastofnun landsins, CDC.

CNN segir að með þessu náist hjarðónæmi í sumar með bólusetningum einum saman. Líklegt megi teljast að það náist enn fyrr ef þeir eru teknir með í reikninginn sem eru ónæmir fyrir veirunni eftir smit.

Sérfræðingar telja að 70 til 85% þjóðarinnar þurfi að vera ónæm gegn veirunni til að hjarðónæmi náist og þannig dragi úr dreifingu veirunnar. Rúmlega 8% landsmanna hafa nú lokið bólusetningu en það eru 28 milljónir.