Elva Björk Ágústsdóttir,  sálfræðikennari og umsjónarkona Poppsálarinnar, skrifar:

Árið er 2008. Ung, vinsæl og hæfileikarík söngkona er að ganga í gegnum gríðarlega erfiða tíma. Hún er að skilja við barnsföður sinn, kveðja dauðvona frænku, er föst í slæmri forræðisdeilu við fyrrum eiginmann sinn og virðist vera að tapa því máli. Ofan á allt þetta er hún hundelt af fjölmiðlum allan liðlangan daginn. Allt sem hún gerir er myndað, skráð og slúðrað um, hvort sem það er að kíkja á kaffihús eða mæta í klippingu. 

Ljósmyndararnir sem fylgja henni hvert fótspor fara langt yfir strikið, elta hana á röndunum og áreita. Hún biður þá ítrekað að hætta og gefa sér svigrúm til að komast leiðar sinnar til að sinna sínum erindum. 

Regnhlífarskandallinn

Kvöld eitt, í miklum tilfinningarússíbana og vanlíðan, reynir hún að ná tali af barnsföður sínum til að fá að hitta börnin þeirra tvö. Ljósmyndarar elta hana, áreita og hindra för hennar.  Hún reynir af fremsta megni að halda sönsum og hunsa þá, en gefst að lokum upp og slær regnhlíf í bíl eins ljósmyndarans. REGNHLÍF!! Þetta var skandallinn! Þetta var slúðrið! 

Einnig þótti mjög fréttnæmt að þessi sama kona ákvað að losa sig við ónýtar hárlengingar með því að raka af sér hárið. Hárgreiðslukonan sem tók á móti henni virðist ekki vera til í þetta verkefni, líkt og það að kona vilji raka af sér hárið sé ein mesta synd sem hugsast getur. Unga konan tekur því málin í sínar hendur, nær í rakvélina og hefst handa við að losa sig við ónýta hárið. ÞETTA var líka skandall! Alveg hræðilegur skandall!!

Mögulega var unga konan að díla við mikla erfiðleika í ofanálag. Hún upplifði mörg áföll á einum bretti og virtist vera að ganga í gegnum tímabil andlegra erfiðleika. 

Frelsissvipt á toppnum

Árið er 2021. Konan er ennþá vinsæl og hæfileikarík en ekki lengur eins ung. Konan er 38 ára. Börnin orðin þó nokkuð eldri og hún ennþá moldrík og dugleg að vinna. 

Eftir þessa hræðilegu skandala hennar rúmlega 12 árum áður hefur henni tekist að gefa út nokkrar plötur, farið í tónleikaferðalag um heiminn, nokkrum sinnum, og haldið úti einni vinsælustu og arðbærustu tónleikaröð sem haldin hefur verið í heiminum. Hún hefur framleitt snyrtivörulínu, samið lög, leikið í þáttum og unnið til verðlauna. 

Þessi sama kona hefur ekki verið frjáls í 12 ár! Eftir þessa “stórvægilegu” skandala árið 2008 var hún svipt sjálfræðinu og hefur ekki lögræði yfir fjármálum sínum né persónulega lífi. Faðir hennar og aðrir lögfræðingar hafa í 12 ár stjórnað lífi hennar. Hún má ekki kjósa, ekki eignast börn, ekki keyra bíl eða velja sér vini og maka. Hún má ekki stunda nein viðskipti eða vinna án þess að bera það undir föður sinn. Sumir vilja meina að hún hafi ekki aðgang að samfélagsmiðlum eða öðru á netinu og vitað er að hún hefur ekki haft frelsi til að ráða sinn eigin lögfræðing. 

Þessi duglega, atorkusama kona þykir nógu heilbrigð til að vinna eins og skepna daginn út og inn að þéna óskiljanlegar fjárhæðir, sem renna til þeirra sem stjórna hennar lífi, en ekki nógu heilbrigð til að keyra bíl eða kaupa sér kaffi án þess að fá samþykki eldri manna fyrir því. 

Daniel Oliver og Fjóla Heiðdal koma í Poppsálina

Í nýjasta þættinum af hlaðvarpinu Poppsálin er farið ítarlega yfir #FreeBritney málið. Fjóla Heiðdal, feministi og Britney Spears aðdáandi, og Daniel Oliver, söngvari og veitingahúsaeigandi mæta til Elvu Bjarkar sálfræðikennara og píkupopps-aðdáanda í Poppsálina og kryfja þetta sérkennilega mál. 

Þau fara yfir það hvað varð til þess að hin ástsæla Britney Spears missti sjálfræðið. Þau velta því fyrir sér hvort staðan væri mögulega öðruvísi ef Britney væri ekki kona. Einnig spekúlera þau í því hvort einhverjar breytingar séu í vændum eftir að heimildamynd um söngkonuna, Framing Britney var frumsýnd. 

Hver er þessi Lou Taylor?

Nokkrar kenningar hafa verið áberandi um #FreeBritney málið  og tengist sú helsta því að faðir hennar, Jamie Spears græði mikið á því að hafa þessa stjórn yfir dóttur sinni. Einnig þykir mörgum það grunsamlegt að kona að nafni Lou Taylor virðist tengjast þessu máli. En Taylor virðist vera einhvers konar umboðsmaður frægra einstaklinga sem þurfa aðstoð af viðkvæmum og sérkennilegum ástæðum.

Hún er einnig þekkt fyrir mjög sérstakar og jafnvel skaðlegar kristilegar skoðanir. Hún rekur, ásamt eiginmanni sínum, prestinum Rob Taylor, búðir fyrir stúlkur í vanda sem líkt hefur verið við sértrúarsöfnuð. 

Þessi sama Taylor hefur nokkrum sinnum reynt að ná stjórn á ungum söngkonum í viðkvæmri stöðu. Margir muna eftir því þegar Taylor vildi taka að sár mál Leikkonunnar Lindsay Lohan.  Lohan var svipt sjálfræðið fyrir nokkrum árum síðan á meðan hún var að leita sér aðstoðar. 

Faðir Lindsay Lohan, Michael Lohan, kom þó í veg fyrir það að Taylor næði að taka stjórnina í sína hendur og hefur talað opinskátt um það hve ósáttur hann var með afskiptasemi þessarar konu. 

Að lokum þá hefur Taylor einnig verið bendluð við mál leikkonunnar Amöndu Bynes sem einnig hefur gengið í gegnum erfiða tíma og þurft að leita sér aðstoðar og nú nýlega birtust upplýsingar þess efnis á netinu að þessi sama kona tengist tilraunum Kardashian-fjölskyldunnar til að svipta rapparanum Kanye West sjálfræðinu. 

Þessar pælingar sem og aðrar um frelsissviptingu Britney Spears eru ræddar í nýjasta þættinum af Poppsálinni. 

Hægt er að nálgast þennan þriðja þátt um málið hennar Britney Spears hér: 

Einnig er hægt að styrkja framleiðslu þáttanna með því að kaupa kaffibolla handa þáttastjórnanda með því að kíkja hér: https://www.buymeacoffee.com/poppsalin