Þórólfur Guðnason sóttvarnalæknir segir að sér hafi komið verulega á óvart hversu margar flökkusögur fóru í gang og keyrðu upp væntingar fólks um að búið yrði að bólusetja þorra þjóðarinnar á skömmum tíma vegna mögulegs rannsóknarverkefnis með lyfjaframleiðandanum Pfizer. Þetta kom fram á upplýsingafundi dagsins. Þórólfur bendir á að umræðurnar hafi ávallt verið óformlegar og engin samningsdrög komið fram. Það hafi hann ávallt áréttað. Ólíklegt er nú að af verkefninu verði en þó hefur það ekki endanlega verið slegið út af borðinu.

Þórólfur er ekki síður undrandi á siðferðisspurningum sem heimspekingar hafi borið fram vegna rannsóknar sem aldrei lá fyrir að yrði gerð.

Ein siðferðisspurningin var sú hvort verjandi væri að Ísland myndi troðast fram fyrir aðra í bóluefnabiðröðinni með þessu samstarfi. Þórólfur benti á að tillögurnar hafi snúið að því að gera vísindalegar rannsóknir sem hefðu gagnast öllum. Annað bóluefni sem annars hefði komið til Íslands hefði þá farið til annarra þjóða. Ef við hefðum reynt að troða okkur fram fyrir í röðina án skuldbindinga hefði það hins vegar verið rangt, að mati Þórólfs.

Þórólfur sagði jafnframt að það sé hjá heimspekingunum að landsmenn hafi ekki verið upplýstir um gagnsemi rannsóknar af þessu tagi. Gagnseminni hefði margoft verið lýst.

Ennfremur minnti Þórólfur á að ávallt hefði verið leitað eftir upplýsti samþykki þeirra sem hefðu tekið þátt í rannsókninni og höfnun á því að taka þátt hefði aldrei leitt til þess að fólk fengi ekki bólusetningu.

Á fundinum kom fram að hvorki voru innanlandssmit né smit á landamærum í gær. Á síðustu viku hafa greinst þrjú innanlandssmit og voru allir í sóttkví. 17 hafa greinst á landamærum, en þar af aðeins 6 virk smit.

Verið er að kanna hvernig best er hægt að tryggja að smit berist ekki inn fyrir landamærin og verða tillögur þar um sendar heilbrigðisráðherra á næstu dögum.

Þórólfur segir að vel komi til greina að slaka á samkomutakmörkunum á næstunni ef vel gengur áfram við að halda niðri smitum. Núverandi reglugerð um gildir til 3. mars. Góðir möguleikar eru á tilslökunum fyrir þann tíma.