Öryggisráði Sameinuðu þjóðanna tókst ekki að ná saman um yfirlýsingu um málefni hins stríðshrjáða Sýrlands á þriðjudaginn. Sérstakir sendimenn SÞ hafa reynt að koma friðarferli af stað en Rússar, sem eru nánustu bandamenn sýrlenskra stjórnvalda, komu ítrekað í veg fyrir að rætt væri um málið á fundi ráðsins á þriðjudaginn.

Þetta segja ónafngreindir heimildarmenn. Rússar hafa ekki komið með neina opinbera skýringu á þessari afstöðu sinni.

Átökin í Sýrlandi brutust út 2011 eftir að mótmæli gegn stjórn Assad voru bæld niður á hrottalegan hátt. Síðan þá hafa rúmlega 380.000 manns látið lífið og milljónir hafa hrakist frá heimilum sínum.

Óteljandi friðarumleitanir SÞ hafa ekki dugað til að binda enda á blóðbaðið.