Kári Stefánsson, forstjóri ÍE, segir rangt að túlka höfnun Pfizer á því að setja hér í gang rannsóknarverkefni sem fæli í sér bólusetningu meirihluta þjóðarinnar, á þann hátt að betra hefði verið fyrir Íslendinga að ná verri árangri í sóttvörnum. Viðræður Kára og Þórólfs Guðnasonar við lyfjaframleiðandann um mögulegt rannsóknarverkefni hafa staðið yfir með hléum frá því í desember. Niðurstaða Pfizer er sú að smit séu of fá hér til að verkefnið skili fýsilegri þekkingu.
„Eina réttlætingin fyrir því að hingað komi 500 þúsund skammtar af þessu bóluefni, fram fyrir röðina, væri sú að þá mætti búa til nýja þekkingu sem myndi gagnast afgangi heimsins. Það er ekkert annað. Við eigum engan sérstakan rétt á því að fá bóluefni á undan öðrum. Það má leiða rök að því að okkur hafi gengið svo vel að hemja þennan faraldur að við eigum minni rétt en aðrir til að fá bóluefni.“
Blaðamaður spurði hvort við ættum þá að líta á þetta jákvæðum augum.
„Ég er alls ekki að segja að við eigum að líta á þetta jákvæðum augum. Þetta er bara staðreynd. Svona er lífið. Réttlætingin fyrir því að gera þessa tilraun, til að flytja þessa skammta til landsins, var sú að þannig mætti sækja nýja þekkingu. Mat manna á þessum fundi var að tilfellin væru of fá á Íslandi í dag að það yrði erfitt að kreista það út úr þeim sem væri nægjanlega mikið til að réttlæta það að flytja þessa skammta til Íslands. Það er ósköp einfalt.“
„Það er ekkert annað framundan en að þreyja þorrann og bíða eftir því að við fáum bóluefni í sömu röð og aðrir,“ segir Kári.
