Omar Quraishi, framkvæmdastjóri fjölmiðilsins PMC í Pakistan, segir að mikið sé um falsfréttir þegar kemur að baráttu Johns Snorra Sigurjónssonar við tind fjallsins K2. John Snorri lagði af stað í átt að tindinum ásamt þeim Ali Sadpara og Juan Pablo Mohr klukkan átta á fimmtudagskvöld en ekkert ef spurst til þeirra í töluvert langan tíma.
Á samfélagsmiðlinum Twitter fjallar Omar um falsfréttirnar varðandi John Snorra, Sadpara og Pablo Mohr. Omar segir að nokkrar vefsíður og sjónvarpsstöðvar hafi byrjað að greina frá því að fjallgöngumennirnir hafi náð á topp fjallsins í gærkvöldi. „Skólabókardæmi um það hvernig fjölmiðlar falla fyrir fölskum eða röngum fréttum,“ segir Omar. „Mest lesni fjölmiðillinn á ensku í Pakistan var með fréttirnar á forsíðunni í dag,“ segir Omar og bendir á að fjölmiðlar hefðu getað komist hjá þessu með því að kanna áreiðanleika upplýsinganna.
Lesa meira Ekki heyrst frá John Snorra í 37 klukkutíma – Uppfært
„Þeir þurfa að skilja hvort fréttirnar sem þeir sækja á samfélagsmiðla séu réttar eða ekki – það er í lagi ef almennir lesendur geta ekki gert sér grein fyrir því en yfirmenn fjölmiðla og starfsmenn þeirra eru ekki almennir lesendur – þeir stjórna því sem er prentað.“
A case study in how mainstream media continues to fall for fake or incorrect news
Several news websites & a few TV channels on the evening of Feb 5 began reporting that climbers Ali Sadpara (Pakistan), John Knorri (Iceland) & JP Mohr Prieto (Chile) had managed to summit K2 pic.twitter.com/ufEVyN4OpI
— omar r quraishi (@omar_quraishi) February 6, 2021
Omar bendir til að mynda á að opinber aðgangur Ali Sadpara á Twitter hafi beðið fjölmiðla um að hætta að birta falsfréttir um að tindinum sé náð. „Við höfum enga beina samskiptaleið við hópinn. Við vitum ekki ennþá nákvæmlega hvar þeir eru,“ var skrifað á Twitter-aðgangi Sadpara. „Falsfréttirnar sem eru úti um allt í fjölmiðlun eru skammarlegar fyrir blaðamennskuna.“
Eins og áður kemur fram hefur ekkert spurst til Johns og félaga í langan tíma, eða um 38 klukkustundir þegar þessi frétt er skrifuð. Fyrr í morgun sendi herinn í Pakistan þyrlur til að leita að þremenningunum en nú hefur verið greint frá því að leitin skilaði engum árangri. Þá fer veðrinu versnandi á fjallinu.
