Héraðsdómur Vesturlands dæmdi í gær karl og konu hvort um sig í 60 daga fangelsi skilorðsbundið til tveggja ára vegna hættulegrar líkamsárásar og ólögmætrar nauðungar sem átti sér stað í sumarbústað.
Brotaþoli var barnsmóðir karlmannsins, en á vettvangi voru einnig sambýlismaður konunnar, ársgamalt barn þeirra, auk tveggja ungra sona konunnar og árásarmannsins, sem voru átta og fimm ára gamlir. Umrætt atvik átti sér stað í miðvikudaginn 18. desember 2018.
Segja má að sumarbústaðaferðin hafi breyst í martröð brotaþoli fann óviðeigandi myndir af öðrum syninum á fartölvu. Sýndu myndirnar hann á kynferðislegan hátt. Sagðist hún hafa spurt árásarmanninn út í myndirnar. Hann hafi átt erfitt með að trúa þessu og komið í bústaðinn og viljað sjá myndirnar.
Þá hafi átökin byrjað. Maðurinn sagðist einungis hafa ætlað að skoða myndirnar, en konan segir hann hafa reynt að hrifsa tölvuna af sér til þess að taka hana á brot. Þau hafi verið að togast á um tölvuna þegar árásarkonan hafi skyndilega komið aftan að barnsmóðurinni, tekið hana niður og lagst á hana.
Konan og karlinn beittu þá brotaþola barsmíðum, kýlt hana ítrekað í höfuð og líkama, rifið í hár hennar og líkama og sparkað og stappað ítrekað á henni. Að minnsta kosti einu sinni spörkuðu þau í höfuð brotaþola. Á meðan hafi börnin og sambýlismaðurinn horft á. Í sumum lýsingum kemur fram að á meðan á þessu stóð hafi synirnir grátið og beðið föður sinn um að hætta árásinni.
Með þessu hafi þau ógnað lífi, heilsu og velferð barnsmóðurinnar. Þá er athæfið sagt hafa verið „vanvirðandi, ógnandi og ruddalegt“ gagnvart börnunum.
Fram kemur að brotaþoli hafi verið með mikla áverka sem passa vel við lýsingar hennar.
Í dómnum er vitnað í skýrslur sem teknar voru af sonunum í Barnahúsi. Sá eldri lýsti atburðum á þennan veg:
„Hann var að halda mömmu niður, þá kom [árásarkonan] og sparkaði mömmu í hausinn og þau voru að kýla mömmu.“
„Ég sá að þau voru að ráðast á mömmu mína, það var þarna.“
„Ég sá líka að þau voru að kýla hana.“
„Hún bara joinaði pabba og lamdi mömmu líka. Þau voru bara að reyna að ná Ipadinum.“
Sá yngri lýsti atburðunum á þennan veg:
„Pabbi minn, hann vildi sjá eina mynd og sagði við hana. Og ég sagði við hann, við söknum hans báðir. Og þá lét mamma mín ekki fá tölvuna. Svo fór hún og pabbi minn halti henni niðri. Og [árásarkonan] sparkaði í hausinn hennar, kýla hana. Og svo tók [árásarkonan] tölvuna af mömmu minni.“
Líkt og áður segir hlutu konan og karlinn 60 daga skilorðsbundinn fangelsisdóm fyrir athæfið. Þá þurfa þau að borga 250 þúsund krónur óskipt í miskabætur, auk annars kostnaðar. Var meðal annars litið til þess að fólkið hafði ekki áður gerst brotlegt við lög.
