Kolbrún Eik er 13 ára stelpa og á að fermast í vor. Hún er algjör prakkari og elskar að syngja og syngur oftast allan daginn og er alltaf í góðu skapi. Hún er mjög félagslynd og elskar að heilsa fólki. Hana langar að kynnast öllum sem hún hittir. Kolbrún er með fjölþætta fötlun í tengslum við sjaldgæft, meðfætt heilkenni sem kallast Saethre-Chotezen.

Hún elskar að hjóla, ferðast og fara í strætó og byrjaði stuðningsfulltrúi hennar, Sólrún Kristjánsdóttir, söfnun fyrir nýju hjóli handa Kolbrúnu. Hún hafði safnað flöskum og dósum í rúmt ár en til að fá hjólið fyrir vorið þurfti að panta það núna í febrúar.

Embla Sigurgeirsdóttir, móðir Kolbrúnar, veitti ofangreindar upplýsingar í samtali við blaðamann. Nokkru áður birti hún Facebook-færslu fyrir hönd Kolbrúnar og Sólrúnar:

„Söfnunin hófst fyrir ári síðan í gegnum stuðningsfulltrúa Kolbrúnar, hana Sollu. Hún sá annað svona hjól þegar hún hitti foreldri sem hafði keypt svona fyrir barnið sitt og fannst henni upplagt að kaupa svona fyrir Kolbrúnu. Þannig söfnunin er frá henni en hún hefur verið að safna flöskum og dósum fyrir Kolbrúnu og var komin upp í 730 þúsund þegar Facebook-færslan kom inn.“

Söfnunin fór fram úr björtustu vonum og á fáeinum klukkutímum var búið að tæplega tvöfalda upphæðina sem Solla hafði safnað og Kolbrún gat keypt sér nýja hjólið.

Embla uppfærir upprunalega statusinn með orðum sem lýsa vel tilfinningunum sem hún fann fyrir eftir að þau náðu markmiðinu:

„Elsku besta fólk við erum í skýjunum yfir viðbrögðum ykkar en við erum búin að ná markmiði okkar og það á fáeinum klukkutímum!!!!! Við erum í sjokki hvað fólk er fallegt, svo margir búnir að leggja inn og margir sem þekkja Kolbrúnu ekkert. Frá okkar dýpstu hjartarrótum með tár í augum TAKK þið eruð yndisleg“

Færsluna má lesa í heild sinni hér:

https://www.facebook.com/embla.sigurgeirsdottir/posts/10158825722927777