Ægir brugghús þvertekur fyrir ásakanir Guðlaugar B. Guðjónsdóttur, framkvæmdastjóra Krabbameinsfélags höfuðborgarsvæðisins sem hún lét falla í frétt DV á föstudaginn um að Ægir brugghús og aðrir aðstandendur góðgerðarbjórsins Lofts hlytu að vera að græða á útgáfunni. Bjórinn hafði þá verið bannaður vegna ábendinga Guðlaugar um að merkingarnar á umbúðum bjórsins væru ólöglegar. Bjórnum var fljótlega kippt úr sölu í kjölfarið.

Aðspurð hvort hún gerði engan greinarmun á því að um listræna tjáningu væri að ræða á umbúðunum, en þar kemur fram teiknuð útgáfa af frægri ljósmynd sem tekin var af Lofti er hann lifði sagði Guðlaug þvert nei. Á myndinni var Loftur að reykja sígarettu. Þá var Guðlaug jafnframt spurð hvort henni hafi ekki þótt rétt að líta til þess að um góðgerðarmál væri að ræða, en eins og all oft hefur komið fram rennur allur ágóði sölu bjórsins til Minningarsjóðs Lofts Gunnarssonar, markmið hvers er að gera líf útigangsmanna á Ísland bærilegra. „Heldurðu að áfengisframleiðandinn sé ekki að hagnast á þessu líka?“ spurði Guðlaug blaðamann á móti.

Bjórinn er samstarfsverkefni Móa bruggfélags, Ægis brugghúss og Minningarsjóðs Lofts Gunnarssonar. Aðstandendur Minningarsjóðsins eru meðal annars ættingjar og vinir Lofts.

Ólafur S.K. Þorvaldz hjá Ægi Brugghúss mótmælir, sem fyrr segir, þessum yfirlýsingum Guðlaugar og segir þær alrangar. Því til stuðnings sendi hann DV kostnaðarskiptingu á útgáfu bjórsins, sem sjá má hér að neðan:

Samkvæmt þeirri kostnaðarskiptingu rennur meira í vasa ríkisins (199 krónur), en rennur í minningarsjóðinn (92 krónur) og hagnaðurinn er enginn.

Nú vinna forsvarsmenn Ægis hörðum höndum að því að endurmerkja dósirnar og fá nýjar merkingar samþykktar. Að þeirri blessun lokinni verður hægt að hefja sölu á bjórnum í Vínbúðum ríkisins að nýju. Að sögn Ólafs liggur blessun Heilbrigðiseftirlitsins þegar fyrir og bíða þeir nú eftir því að fá jákvæð frá ÁTVR. „Ég á ekki von á öðru en að svo fari,“ segir Ólafur.

Nýju merkingarnar má sjá hér að neðan.