Skeytasendingar milli Þórólfs Guðnasonar sóttvarnalæknis og Kára Stefánssonar, forstjóra ÍE, áttu sér stað rétt fyrir jól. Kári greindi frá því í fjölmiðlaviðtölum að hann hefði gert þá tillögu við bóluefnaframleiðandann Pfizer að íslenska þjóðin yrði notuð undir rannsókn fyrirtækisins á aukaverkunum bóluefnis fyrirtækisins gegn COVID-19 og þannig yrði greitt fyrir nægu bóluefni til Íslands á skömmum tíma, utan við samflot með Evrópusambandinu sem virðist ekki ætla að tryggja þjóðinni nægilegt bóluefni fyrr en seint á næstu ári.

Þórólfur benti þá á að hann hefði stungið upp á þessu við Pfizer þann 15. desember, allnokkru fyrr en Kári. Kári svaraði því til að hann hefði ekki vitað af þeirri tillögu Þórólfs og hann væri fyllilega fær um að varpa fram slíkri hugmynd án þess að fá hana að láni frá Þórólfi.

Núna hefur Kári skýrt frá því í nýrri tilkynningu að Þórólfur og Kári muni sitja næsta fund saman með fulltrúum Pfizers. Kári fer fögrum orðum um Þórólf og ritar:

„Til áréttingar: Þórólfur Guðnason sóttvarnarlæknir og ég , Kári Stefánsson , erum ekki í neinu stríði. Við vinnum eins náið saman og verkefnin kalla á. Hann er leiðtogi okkar í baráttunni og ég og mitt fólk fáum af og til að leggja að mörkum þegar það á við. Það voru mistök af minni hálfu að hafa Þórólf ekki með mér þegar ég hafði samband við Pfizer en hef mér það til varnar að því sambandi var komið á í gegnum samstarfsmenn mína í Bandaríkjunum og ég hafði litla stjórn á ferðinni. Góðu fréttirnar eru þær að næsta fund með Pfizer tökum við Þórólfur saman og ef hann gengur vel dreg ég mig í hlé og skil þetta alfarið í höndunum á honum enda hæfir það hans hlutverki í íslensku heilbrigðiskerfi. Þórólfur hefur stýrt okkur ótrúlega vel og ljúfmannlega í gegnum tíu mánaða faraldur og er manna best til þess fallinn að beita bólusetningum til þess að koma okkur endanlega út úr honum.“

https://www.facebook.com/karistefansson66/posts/10158713733584089