Ari Leifsson og Valdimar Þór Ingimundarson leikmenn Strømsgodset í Noregi hafa verið settir í tíu daga sóttkví vegna COVID-19 smits hjá leikmanni U21 árs landsliðs Íslands.
Umræddur leikmaður U21 árs landsliðsins spilar í Danmörku samkvæmt frétt Fótbolta.net. Þar segir að leikmaðurinn hafi greinst með veiruna þegar hann snéri aftur til Danmerkur.
Íslenska liðið lékk gegn Lúxemborg ytra á þriðjudag en ekki er vitað til þess að annar leikmaður úr hópnum sé smitaður.
Ari og Valdimar þurfa að fara í tíu daga sóttkví samkvæmt vef Strømsgodset þó að veiran hafi ekki mælst í þeim við komuna til Noregs.
Veiran hefur verið að hrjá íslensk landslið en eins og frægt er orðið fór allt starfslið A-landsliðs karla í sóttkví eftir smit hjá Þorgrími Þráinssyni starfsmanni liðsins.
Arnar Þór Viðarsson stýrði U21 árs landsliðinu á þriðjudag en flaug svo heim til að stýra A-landsliði karla á miðvikudag. Arnar gæti því hafa verið útsettur fyrir smiti af þessum umrædda leikmanni þegar hann kom til landsins en hann fékk að fara í vinnusóttkví til að stýra leiknum. Arnar fór í veirupróf við komuna til landsins og greindist ekki með hana í sér.
