Meðal þeirra eyja sem uppreisnarmennirnir náðu á vald sitt nýlega eru Vamizi og Mecungo sem eru þekktir lúxusdvalarstaðir þar sem stjörnur á borð við Cristiano Ronaldo, Daniel Craig (James Bond) og Bono (söngvari U2) hafa dvalið. Engir útlendingar voru á eyjunum þegar uppreisnarmennirnir náðu þeim á sitt vald því landið hefur verið lokað ferðamönnum vegna heimsfaraldurs kórónuveirunnar.
Árásin var gerð aðfaranótt 18. september. Á myndum á samfélagsmiðlum sést að búið er að brenna hótel, ferðamannaaðstöðu og bíla. Íbúar sögðu fréttamönnum að uppreisnarmennirnir hefðu komið siglandi á litlum bátum og beðið alla um að yfirgefa eyjurnar.
„Þeir ráku fólk út úr húsunum og kveiktu í þeim. Þeir gerðu engum mein en skipuðu öllum að yfirgefa eyjurnar,“
sagði einn eyjaskeggja.
Eyjurnar og Mocímboa da Praia eru í Cabo Delgado héraðinu við landamæri Tansaníu. Uppreisnarmenn hafa beint sjónum sínum að þessu svæði á undanförnum árum því hafnarborgin er aðeins 50 kílómetra frá frá stærstu náttúrugassvæðum álfunnar. Einnig eru stórar rúbínnámur þar.
Uppreisnarmennirnir hafa lýst því yfir að þeir vilji gera Mocímboa da Praia að höfuðborg sinni og taka upp sharíalög.
Sérfræðingar hafa á undanförnum árum varað við fyrirætlunum Íslamska ríkisins um að leggja stærri landsvæði í Afríku undir sig. Árásum hópa, sem styðja samtökin, hefur fjölgað í álfunni á síðustu árum.
Stjórnvöld í Suður-Afríku, sem er nágrannaland Mósambík í suðri, hafa boðið aðstoð sína, bæði leyniþjónustu og her. Ef þetta boð verður þegið segir Íslamska ríkið að árásir verði gerðar í Suður-Afríku. Það er opinbert leyndarmál að málaliðar úr hinum svokallaða Wagnerhópi, sem er stýrt af rússneskum yfirvöldum hafa lengi verið til staðar í Mósambík þar sem þeir aðstoða stjórnvöld í baráttunni við uppreisnarmenn. Þetta er hluti af aðgerð Rússa til að auka áhrif sín í álfunni.
