Hugmyndin virtist svo fáránleg að hún hefði kannski ekki átt að verða að veruleika en hún varð að veruleika í síðasta mánuði. Þá stóðu tvö flugfélög í Japan og á Taívan fyrir undarlegum flugferðum þar sem áfangastaðurinn var sami flugvöllurinn og flogið var frá. Farþegarnir fóru sem sagt í nokkurra klukkustunda flugferð án nokkurs eiginlegs áfangastaðar.

Næg eftirspurn var eftir þessum ferðum. Farþegarnir fengu auðvitað mat og drykk í ferðinni og þeir sem voru svo heppnir að sitja við glugga gátu notið útsýnisins en reynt var að fljúga yfir fallega staði.

Samkvæmt frétt CNBC þá er þessi ferðamáti nú í þróun sem hluti af „staycation“ hugtakinu sem nær yfir að vera í fríi heima því ekki er hægt að fara úr landi vegna heimsfaraldurs kórónuveirunnar. Sem sagt að vera í fríi en samt heima.

Singapore Airlines ætlar nú að þróa þessa hugmynd aðeins betur og bjóða upp á ferðir með engan áfangastað. Ferðirnar munu hefjast á Changi-flugvellinum í Singapore. Þaðan hefja vélarnar sig á loft og lenda aftur. Þá fara farþegarnir með glæsibifreiðum að lúxushóteli þar sem þeir verða í smá fríi. Þeir sem eru reiðubúnir til að borga nógu mikið geta fengið aðgang að lúxusbiðsal Singapore Airlines þar sem boðið er upp á mat og drykk. Þar hlýtur umgjörðin að vera góð því flugfélagið hefur margoft verið kjörið besta flugfélag heims.