Námumaður í Lesótó í Afríku fann nýlega einn stærsta demantinn sem fundist hefur. Talið er að verðmæti hans geti verið sem nemur allt að 2,5 milljörðum íslenskra króna. Demanturinn fannst í Letsengnámunni en þar hafa margir verðmætir demantar fundist í gegnum tíðina.

Bloomberg skýrir frá þessu. Námumaðurinn, sem fann demantinn, starfar hjá Gem Diamonds Ltd. sem á um 70% hlut í námunni. Fyrirtækið telur að demanturinn sé 442 karöt. Sérfræðingur hjá BMO Capital Markets telur að hægt verði að selja hann fyrir 18 milljónir dollara en það svarar til um 2,5 milljarða íslenskra króna.

Demantar, sem finnast í Letsengnámunni, eru með hæsta meðalsöluverðið í heiminum. Fyrir tveimur árum síðan fann Gem Diamonds Ltd. 910 karata demant þar en hann var á stærð við tvær golfkúlur. Hann seldist fyrir sem nemur um sex milljörðum íslenskra króna.