KR gerði góða ferð á Akranes í gær er liðið spilaði við ÍA í þriðju umferð úrvalsdeildar karla. Fyrri hálfleikur kvöldsins var engin frábær skemmtun en engin mörk voru skoruð.
Ballið byrjaði á 48. mínútu er Steinar Þorsteinsson skoraði fyrir ÍA með góðu skoti sem Beitir réð ekki við í markinu. Aron Bjarki Jósepsson var næstur á blað en hann jafnaði metin fyrir KR stuttu seinna eftir hornspyrnu. Kristján Flóki Finnbogason tryggði KR svo stigin þrjú eftir fallegt spil. Seinna fékk KR vítaspyrnu en Pálmi Rafn Pálmason klikkaði á punktinum. Lokatölur, 1-2.
Jóhannes Karl Guðjónsson þjálfari ÍA var pirraður eftir leik og Hjörvar Hafliðason, eigandi Dr. Football hefur sína kenningu um það. Jóhannes virkar oftast ansi pirraður eftir leiki gegn KR.
„Ég get sagt ykkur það, flestir sem eiga bræður og svona. Síðasta sem þú nennir er að gera er að tapa fyrir bróður þínum,“ sagði Hjörvar Hafliðason en Bjarni Guðjónsson bróðir Jóa Kalla er aðstoðarþjálfari KR.
„Það hellir olíu á eldinn, búnir að vera slást frá því að þeir voru fimm ára.
Mikael Nikulásson segir að Jóhannes hrauni alltaf yfir KR eftir leiki. „Hann tekur KR liðið út eftir alla leikina, eftir tapleiki. Hraunar yfir þá, hvað þeir spila leiðinlegan fótbolta.“
