Efling greinir frá því að eini borgarfulltrúi meirihlutans í Reykjavík sem hafi þegið boð um samtal með trúnaðarmönnum Eflingar hafi verið Dóra Björt Guðjónsdóttir, borgarfulltrúi Pírata.
„Líf Magneudóttir, borgarfulltrúi vinstri grænna, sendi Eflingu skilaboð um að hún sæi sér ekki fært á mæta á umræddum tíma. Hins vegar væru hún og Elín Oddný Sigurðardóttir, varafulltrúi Vinstri grænna, tilbúnar til að finna annan tíma til að kynna sér sjónarmið Eflingar. Hvorki Dagur B. Eggertsson, borgarstjóri, né Þórdís Lóa Þórhallsdóttir, formaður borgarráðs, hafa svarað erindi Eflingar,“ segir á vef verkalýðsfélagsins.
Viðar Þorsteinsson, framkvæmdastjóri Eflingar, segir á Facebook-síðu sinni að umræddi oddvitar virði ekki láglaunafólk svars. „Oddvitar Viðreisnar og Samfylkingarinnar virða láglunafólk hjá borginni ekki svars þegar það býður þeim til fundar. Oddviti VG vill hittast seinna. Eingöngu oddviti Pírata þiggur boð um að koma og hitta Eflingarfélaga,“ segir Viðar.
Sólveig Anna Jónsdóttir, formaður Eflingar, bauð fulltrúunum til fundar á fimmtudag. „Markmið fundarins var að kynna fyrir oddvitunum tillögur Eflingar til leiðréttingar á kjörum félagsmanna ásamt því að eiga við þá samtal. Í erindinu var sérstaklega óskað eftir því að svarað yrði eigi síðar en um hádegi á föstudag. Aðeins höfðu tveir af fjórum borgarfulltrúanna svarað þegar fresturinn rann út. Hvorki hafði borist svar frá Degi B. Eggertssyni, borgarstjóra né, Þórdísi Lóu Þórhallsdóttur,“ segir á vef Eflingar.
„Því miður er þetta ekki í fyrsta skipti sem æðstu stjórnendur Reykjavíkurborgar virða ekki starfsmenn sína viðlits í yfirstandandi kjaraviðræðum sem hlýtur enn og aftur að teljast gríðarleg vonbrigði fyrir þennan lægst launaða hóp borgarstarfsmanna.“
