Hjónin Sunday Iserien, 32 ára, og Joy Lucky, 29 ára, eru nígerískir hælisleitendur og hafa búið hér á landi síðastliðið eitt og hálft ár. Þau komu hingað með átta ára gamalli dóttur sinni Mary snemma árs 2016 og óskuðu eftir vernd. Lífið hefur reynst þeim erfitt en þau hafa upplifað ofbeldi, hótanir, gríðarleg áföll og fátækt í Nígeríu og á Ítalíu, en þau flúðu þangað fyrir níu árum. Joy var seld í vændi þegar hún kom til Evrópu en hún hefur aldrei hlotið viðeigandi aðstoð vegna þessa. Útlendingastofnun ætlar á komandi dögum að vísa fjölskyldunni úr landi og til Nígeríu.
„Mary er átta ára glaðlynd stelpa sem talar íslensku og gengur hér í skóla í fyrsta sinn á ævinni,“
segir Ragnheiður Freyja fyrir hönd fjölskyldunnar í samtali við Bleikt. Mary hefur aldrei átt heima í Nígeríu. Hún hefur verið búsett hér á landi í eitt og hálft ár og unir sér vel að sögn Ragnheiðar. Sunday hefur unnið hjá sama byggingarfyrirtækinu í Hafnarfirði allan þann tíma sem þau hafa búið á Íslandi. Joy er að læra íslensku og bíður eftir því að fá sálfræðiaðstoð varðandi afleiðingar þess ofbeldis sem hún varð fyrir.
„Joy er jafnframt mjög hrædd við þá aðila sem seldu hana í ánauð á sínum tíma, snúi hún til baka til heimalands síns.“
Ákveðið hefur verið að fjölskyldan fái ekki hæli né dvalarleyfi á Íslandi á grundvelli þess að Nígería sé öruggt land.
„Það á þó ekki við um þessa fjölskyldu né er það eðlilegt að senda barn þangað sem aldrei hefur búið þar. Það er ekki það sem er Mary fyrir bestu,“
segir Ragnheiður. Sunday og Joy segja að það eina og hálfa ár sem þau hafi búið hér sé í fyrsta sinn í áratug sem þau hafa upplifað öryggi. Áður en hjónin komu hingað höfðu þau búið á Ítalíu þar sem þau bjuggu á götunni og betluðu sér til matar um tíma.
Við meðferð máls þeirra hérlendis var komist að þeirri niðurstöðu að þau væru í of viðkvæmri stöðu til þess að vera send aftur til Ítalíu, meðal annars vegna þess að Joy hefði verið fórnarlamb mansals og að þau væru ung hjón með barn og þau skyldu fá efnislega meðferð hér. Nú hefur verið ákveðið að vísa þeim úr landi og senda þau til Nígeríu.
„Ég er dauður maður ef ég fer aftur til Nígeríu. En þetta snýst ekki um mig heldur dóttur mína. Ég vil að hún fái tækifæri á betra lífi. Ef stjórnvöld senda okkur til baka þá munu þau leggja líf okkar í rúst,“
sagði Sunday við Morgunblaðið.
Aðstandendur og vinir fjölskyldunnar hafa sett af stað undirskriftasöfnun þar sem skorað er á Sigríði Á. Anderssen dómsmálaráðherra til að stöðva þessa brottvísun og krefjast þess að umsókn þeirra verði skoðuð að nýju. Nú þegar hafa safnast rúmlega 1700 undirskriftir.
