Guðrún Sigurbjörnsdóttir, áhrifavaldur sem keppir fyrir hönd Íslands í fegurðarsamkeppninni Miss Global, segist ekki hafa átt sjö dagana sæla undanfarið. Líkt og virðist algengt meðal áhrifavalda þá lenti Guðrún í vanda við skattinn nýverið. Hún segir að það hafi þó endað vel því miskunnarsamur starfsmaður ríkisskattstjóra sá aumur á henni.
„Fyrir nokkrum mánuðum var ég mjög langt niðri og búin að loka mig af frá öllum og öllu í alltof langan tíma. Mér fannst allt ómögulegt, nýbúin að klessa bílinn minn og fleira sem ég ætla ekki að fara útí hérna. Ofan á það gerði ég skattaskýrsluna mína vitlaust og allt í fokki þar,“ lýsir Guðrún á Instagram.
Hún segist hafa verið heppinn með þann sem hringdi. „Ég man svo vel eftir símtali við skattstjóra sem fann greinilega á sér að mér leið ömurlega. Mögulega fann hann það á sér af því ég brotnaði niður í símtalinu og fór að gráta en hann sagði við mig veistu það birtir alltaf til þó manni líði ekki þannig alltaf. Og bætti svo við að hann myndi redda málunum fyrir mig,“ segir Guðrún.
Hún segist þakklát fyrir þetta símtal. „Þetta símtal gerði svo mikið fyrir mig, vildi bara henda þessu út hérna ef eitthver hérna er að bugast. Þetta reddast er frasi sem ég elska og vona að ég hafi náð að peppa eitthvern sem þurfti á því að halda með þessum dramatíska captioni,“ segir Guðrún að lokum.
https://www.instagram.com/p/B5YgM4JlAWk/