Oddný G. Harðardóttir þingmaður Samfylkingarinnar segist hafa orðið uppgefin og vonlítil um að sjónarmið kvenna í samfélagsumræðunni verði metin til jafns á við karla þegar hún las Markaðinn, fylgirit Fréttablaðsins um viðskipti og fjármál í morgun.  Oddný, sem var fjármálaráðherra á árunum 2011 og 2012, taldi myndirnar í blaðinu og fann þar 11 karla og aðeins eina konu:

Stundum verð ég svo uppgefin og vonlítil um að sjónarmið kvenna í samfélagsumræðunni verði metin til jafns á við karla. Slík tilfinning helltist yfir mig í morgun þegar að ég las Markaðinn, fylgirit Fréttablaðsins um viðskipti og fjármál. Blaðið er ágætt og sker sig ekkert sérstaklega frá öðrum blöðum í þessum efnum þó að í blaðinu í dag séu myndir af 11 karlmönnum en bara ein af konu, enda bara tilfinning sem greip mig en ekki niðurstaða vísindalegrar könnunar,

segir Oddný á Fésbók. Rifjar hún upp greiningu Félags kvenna í atvinnulífinu frá því í fyrra sem skoðaði við hverja væri helst talað í fjölmiðlum fyrir síðustu kosningar, þar kom í ljós að einungis þriðjungur viðmælenda í fjölmiðlum væru konur en 67% karlar. Oftast var rætt við Katrínu Jakobsdóttur formann Vinstri grænna. Oddný segir að skýringin sem hafi verið gefin á þeim tíma hafi verið að þar sem forsætisráðherra og fjármálaráðherra væru báðir karlar þá væri þetta eðlilegt hlutfall:

En það sem stóð eftir óskýrt er að karlar voru líka í öllum efstu sætunum árið 2012 en það ár voru bæði forsætisráðherra og fjármálaráðherra konur og reyndar fram á mitt ár 2013. Ég vona að einhver klár háskólanemi skoði þetta betur svo við getum lært af þessu og gert betur. Konur þurfa kannski bara að vera duglegri?