Tunglið er ekki mannvænt í þeim skilningi að fólk geti hafst þar við án þess að nota ýmsan búnað og tæki. Það er þurrt á tunglinu, mikið ryk og ekkert andrúmsloft en það er slatti af súrefni þar. Nú hafa vísindamenn fundið aðferð til að vinna þetta súrefni úr jarðveginum.

Í umfjöllun ScienceDaily um málið kemur fram að mikið sé af súrefni í topplögum jarðvegsins á tunglinu. Þar segir að það sé einnig kostur við vinnsluaðferðina að hún hafi engin umhverfisáhrif í för með sér, skili aðeins súrefni og fullt af málmblöndum sem súrefnið er bundið í. Bæði súrefnið og málmblöndurnar geta komið sér vel í framtíðarverkefnum manna á tunglinu.

40 til 45 prósent af þyngd jarðvegsþekjunnar á tunglinu er súrefni en það er þó ekki hæft til notkunar hér og nú er haft eftir Beth Lomax, efnafræðingi hjá Glasgow háskóla. Hún vann að verkefni sem miðaði að því að finna aðferð til að vinna súrefnið úr jarðveginum.

Nokkur jarðvegssýni frá tunglinu eru til hér á jörðinni síðan á dögum tunglferða Bandaríkjamanna. Þau eru þó of verðmæt til að hægt sé að gera beinar tilraunir á þeim. En tilvist þeirra gerir vísindamönnum kleift að búa til ný sýni sem líkjast tunglsýnunum mjög. Það voru slík sýni sem Lomax og félagar hennar notuðu í verkefninu.

Niðurstaða rannsóknarinnar hefur verið birt í vísindaritinu Planetary and Space Science.