Íslenskir framleiðendur hafa fengið þau skilaboð frá Högum að ef þeir hyggist selja sínar vörur í Costco verði þær fjarlægðar úr hillum Hagkaupa og Bónuss. Þetta segir Viðskiptablaðið og vísar í heimildarmann sem vill ekki láta nafn síns getið.

Eyjan hafði samband við Haga vegna málsins og fékk þau svör að þar væri verið að skoða hvaðan þessi ummæli kæmu, en það væri forstjóra að svara hvort þetta væri rétt eða rangt. Ekki náðist í Finn Árnason forstjóra Haga.

Segist Viðskiptablaðið hafa heimildir fyrir því að þegar Costco bauð íslensku matvælafyrirtæki að taka vörur þess inn í Costco þá hafi það mælst illa fyrir hjá Högum. Þegar þetta spurðist út fékk viðkomandi símtal frá Högum þar sem honum var sagt að ef hann myndi selja sínar vörur í Costco yrðu þær fjarlægðar úr verslunum Hagkaupa og Bónuss.

Verslunareigendur eru einnig uggandi yfir stöðunni þar sem Costco getur selt vörur undir kostnaðarverði þar sem fyrirtækið er ekki með markaðsráðandi stöðu. Sagði einn viðmælandi Viðskiptablaðsins að Costco væri að selja íslenskar vörur undir kostnaðarverði til að laða fólk í verslunina.