Tveimur sjómönnum var bjargað í nótt en mennirnir voru um borð í handfærabát sem strandaði rétt utan við Skála á sunnanverðu Langanesi.

Tilkynning um málið barst stjórnstöð Landhelgisgæslunnar laust eftir miðnætti og var þyrla Landhelgisgæslunnar þegar send á staðinn ásamt björgunarbátum frá Þórshöfn og Bakkafirði og nærstöddum skipum. Þá voru björgunarsveitir frá Raufarhöfn, Þórshöfn og Húsavík sendar landleiðina á vettvang.

Um klukkan 01:20 kom fiskibátur á svæðið en hann gat ekki athafnað sig á svæðinu. Þá var ágætis veður á svæðinu, bjart en nokkur sjór.

Í skeyti frá Landhelgisgæslunni kemur fram að björgunarbátur frá Bakkafirði hafi komið á staðinn um klukkan 02:30 en ekki var talið ráðlegt að reyna björgun frá sjó sökum sjólags. Þá voru aðstæður til björgunar frá landi ekki góðar vegna aðstæðna en strandstaður var undir bjargi.

Þyrla Landhelgisgæslunnar, TF-EIR kom á vettvang um klukkan 02:35 og rúmu korteri síðar var búið að bjarga báðum mönnunum um borð í þyrluna.

Hér að neðan má sjá myndband af störfum Landhelgisgæslunnar í nótt, en óhætt er að segja að aðstæður hafi verið nokkuð krefjandi.