Bílaframleiðendurnir Volkswagen og General Motors hafa ákveðið að hætta framleiðslu á svokölluðum hybrid-bílum, bílum sem ganga bæði fyrir rafmagni og eldsneyti. Þess í stað munu fyrirtækin einblína á bíla sem ganga eingöngu fyrir rafmagni.

Í frétt Fox Business kemur fram að allt snúist þetta um að standast strangar kröfur um útblástur bifreiða sem verið er að innleiða um allan heim. Þá telja forsvarsmenn þessara fyrirtækja að peningunum sé betur varið í þróun rafbíla en hybrid-bíla þar sem framtíðin liggi óhjákvæmilega í rafmagninu.

Scott Keogh, stjórnarformaður Volkswagen í Bandaríkjunum, segir að fyrirtækið ætli í þá átt sem markaðurinn stefni.

Önnur fyrirtæki virðast þó ekki eins viss um að framtíðin liggi eingöngu í rafmagninu. Þannig munu Ford og Toyota halda áfram framleiðslu á hybrid-bílum, Ford F-150 og Toyota Prius sem dæmi. Bæði þessi fyrirtæki stefna þó enn að því að framleiða einnig rafbíla í bland við hybrid-bíla, enda komast þeir lengra en bílar sem eingöngu er knúnir rafmagni.

Volkswagen hyggst setja rafknúinn borgarjeppa á Bandaríkjamarkað á næsta ári og þá er General Motors með tuttugu rafbíla á teikniborðinu sem stefnt er að því að framleiða og markaðssetja á næstu fjórum árum. Þetta eru bæði Chevrolet og Cadillac-bifreiðar.