„Á henni að leyfast það, sem hún sakar einmitt Trump um, að bera fram tilhæfulausar staðhæfingar og ásakanir og þurfa aldrei að svara fyrir orð sín?“ spyr Hannes Hólmsteinn Gissurarson, prófessor í stjórnmálafræði, og vísar í ummæli Sóleyjar Tómasdóttur, fyrrverandi borgarfulltrúa, á Facebook en Sóley nefnir Hannes í tengslum við það sem hún kallar „Trumpvæðingu“ í umræðunni á Íslandi.

Í færslunni ritar Sóley meðal annars að hún hafi haldið að Trumpvæðing væri eitthvað sem ætti sér bara stað á vettvangi stjórnmálanna „en þegar fjölmiðlar dragi Helga Tómasson, Einar Steingrímsson og Hannes Hólmsteinn Gissurarson fram sem sérfræðinga um kynbundinn launamun, sem sé víst ekki til, sé ljóst að Trumpvæðingin sé skollin á af fullum þunga í almennri umræðu á Íslandi.“ Færslan fær ágætis undirtektir og þó nokkrir sem taka undir í athugasemdum.

Á meðan er Hannes ekki par sáttur en í pistli á vef Pressunnar kveðst hann hafa sent Sóleyju skilaboð þar sem hann taki fram að hvergi í umræðunni hafi verið verið óskað eftir áliti hans á launamun kynjanna. „Ég er, held ég, eini kennarinn í stjórnmálafræði, sem er aldrei kallaður til sem álitsgjafi á RÚV til dæmis, um eitt eða neitt.“ Hann segir engin svör hafa borist og svo virðist sem fullyrðingar Sóleyjar séu ekki það eina sem fari í taugarnar á Hannesi.

„Og Hólmsteinn er Hólmstein í þolfalli.“