Sítrónur eru frískandi og góðar í ýmiss konar matargerð. Þær eru hins vegar til margra hluta nytsamlegar og geta verið algjör bjargvættur í ýmsum aðstæðum.
Nokkrir dropar af nýkreistum sítrónusafa geta verndað ávexti eins og epli og banana þegar búið er að skera þá þannig að þeir verða ekki brúnir. Þetta virkar líka með grænmeti. Mundu þetta næst þegar þú ert að skipuleggja mat fyrir vikuna, nesti fyrir krakkana eða að undirbúa kvöldmatinn.
Settu nokkra dropa af sítrónusafa í vatnið sem þú sýður hrísgrjónin í og þau klessast ekki saman. Sniðugt!
Safinn er ekki bara frábær heldur er sítrónubörkur líka algjör snilld. Settu smá börk með púðursykrinum og hann verður ekki harður né hleypur í köggla.
Ef þú átt kál í ísskápnum sem þú ert að spá í að henda því það er frekar lint og litlaust gætirðu prófað að leggja það í bleyti í köldu vatni með hálfum bolla af sítrónusafa og kæla síðan í klukkutíma. Laufin koma endurnærð úr baðinu og þú spornar gegn matarsóun.
Sumir vilja gera fullkomin, harðsoðin egg, en ef það gengur ekki sem best hjá þér geturðu prófað að pensla skurnina með smá sítrónusafa áður en eggin eru soðin. Sítrónusafinn spornar gegn því að skurnin brotni og gerir það auðveldara að taka hana af þegar að eggin eru tilbúin.
Sítrónusafi er frábær til að gera kjöt meyrt og gott, enda brýtur sýran í sítrónusafanum niður próteintrefjar í kjötinu. Prófið því að bæta sítrónusafa við marineringuna næst.
Smá sítrónusafi getur gjörbreytt máltíð og getur komið í staðinn fyrir salt hjá þeim sem þurfa að minnka saltneyslu. Prófaðu næst að sleppa því að salt matinn og kreistu frekar sítrónu yfir hann.
