Það vakti athygli í kvöld er hinn ungi James Garner kom við sögu hjá Manchester United í ensku úrvalsdeildinni.
Margir leikmenn United eru að glíma við meiðsli og má nefna Jesse Lingard, Marcus Rashford, Anthony Martial og Juan Mata.
Það var pláss fyrir Garner á varamannabekk United í kvöld er liðið vann góðan 3-1 útisigur.
Garner er aðeins 17 ára gamall og fékk sæti á bekknum ásamt þeim Tahith Chong og Angel Gomes sem eru einnig taldir mjög efnilegir.
James Garner becomes the latest academy product to make his Premier League debut for Manchester United, aged 17.
Well deserved! ? pic.twitter.com/9eZvdglG79
— The Peoples Person (@PeoplesPerson_) 27 February 2019
Garner er fæddur þann 13. mars árið 2001 en hann skrifaði undir fyrsta atvinnumannasamningin í fyrra.
Garner hefur verið líkt við Michael Carrick, fyrrum leikmann United, sem var frábær miðjumaður á sínum tíma. Garner leikur einnig á miðjunni.
Hann er þekktur fyrir góðar og nákvæmar sendingar og er þá einnig mjög vinnusamur fyrir framan öftustu línu.
Garner var partur af U18 liði United sem vann deildarmeistaratitilinn árið 2017/2018 og var oft með fyrirliðabandið.
Unglingurinn hefur tvisvar áður verið á bekknum en hann var á tréverkinu í leikjum gegn Valencia og Reading á tímabilinu.
Þetta var hins vegar í fyrsta sinn sem Garner fær mínútur í aðalliði United en hann kom inná sem varamaður í blálokin.
Garner er Manchester United út í gegn en hann hefur spilað fyrir félagið síðan hann var átta ára gamall.
Einnig hefur Garner spilað fyrir yngri landslið Englands og var fyrirliði er liðið tapaði fyrir Hollandi í undanúrslitum EM.
,,Hann er Michael Carrick en 20 árum yngri,“ sagði Ole Gunnar Solskjær, stjóri United, um leikmanninn.
