Það fór fram stórleikur á Englandi í gær er lið Manchester United tók á móti Liverpool í ensku úrvalsdeildinni.

Fyrri hálfleikurinn í gær var ansi undarlegur en United þurfti að skipta þremur leikmönnum af velli vegna meiðsla. Liðinu tókst þó að enda leikinn með 11 menn á vellinum en Marcus Rashford var tæpur og var í erfiðleikum. Því miður fyrir áhorfendur var ekki boðið upp á nein mörk í leik gærdagsins en færin voru af skornum skammti. Markalaust jafntefli því niðurstaðan í Manchester sem eru ekki frábær úrslit fyrir þessi lið.

Rashford var einnig að glíma við ökklameiðsli en þurfti að klára leikinn þar sem United var búið með skiptingar. Rashford fann mikið til í ökklanum en reyndi að harka það af sér og gaf sitt besta í leiknum.

Michael Owen, fyrrum leikmaður United og Liverpool, er ekki vinsæll á meðal stuðningsmanna heimaliðsins þessa stundina. Owen vildi sjá leikmenn Liverpool sparka í ökkla Rashford í síðari hálfleik svo hann þyrfti að fara af velli meiddur.

,,Ef ég væri Jurgen Klopp í þessum búningsklefa í hálfleik og Manchester United getur ekki gert fleiri breytingar þá myndi ég segja mínum mönnum að sparka í ökkla Rashford sem hann hefur haltrað á allan fyrri hálfleikinn,“ sagði Owen í gær og stuðningsmenn United voru reiðir.

Owen hefur útskýrt mál sitt á Twitter eftir allt hatrið sem hann hefur fengið.

,,Hafði ekki áttað mig á því að það væri svona mikið af englum hér á Twitter, allir þeir sem eru reiðir yfir ummælum mínum, komist í samband við raunveruleikann. Sem fyrrum leikmaður, þá er ég ráðinn til starfa til að segja hvað er í gangi hjá félögum í landinu,“ sagði Owen í dag.

,,Það var enginn að segja að það ætti að meiða Marcus Rashford, alvarlega. Þeir voru búnir með þrjá skiptingar og ökklinn á honum var ekki í lagi, í hverju einasta búningsherbergi í landinu er svona rætt.“