RÚV hefur hafið sýningar á þriðju þáttaröðinni af Fallinu. Annarri þáttaröðinni lauk með því að lögreglukonan Stella Gibson vafði Paul Spector, hinn helsærða kvennamorðingja, örmum. Henni virtist sannarlega ekki standa á sama um hann.

Í fyrsta þætti þriðju þáttaraðar lá morðinginn í dái í öndunarvél. Einmitt þess vegna gerðist ekkert ógnvekjandi í þættinum. Gillian Anderson í hlutverki Stellu gekk um og endurtók hvað eftir annað að hún vildi að morðinginn myndi vakna því draga þyrfti hann fyrir dóm og ná þannig fram mikilvægu réttlæti. Mann grunar samt að ástæðan sé önnur. Stella hefur, eftir því sem liðið hefur á þættina, orðið æ undarlegri. Hún virðist næstum því háð morðingjanum. Samband þeirra nálgast það að vera pervertískt.

Það er varla hægt að segja að Stella hafi talað í þættinum því svo að segja öll hennar orð voru hvísl. Kannski átti það að vekja hjá manni ugg og eftirvæntingu – sem gerðist nú reyndar ekki. Maður var alltaf að bíða eftir því að eitthvað verulega krassandi gerðist. Helsta von manns er að Spector vakni og láti til sín taka af alkunnri illmennsku sem Stella verði að bregðast við.

Fallið fer afar hægt af stað en í trausti þess að leikurinn eigi eftir að æsast mætir maður samviskusamlega við sjónvarpsskjáinn næstu þriðjudagskvöld. Allavega er áhugavert að fylgjast með þeirri fínu leikkonu, Gillian Anderson, takast á við hlutverk Stellu sem henni hefur tekist að gera að mjög dularfullri og óræðri persónu. Þegar Paul Spector vaknar loks úr dáinu þá munum við örugglega einnig geta dáðst að túlkun Jamie Dornan á manni sem er greinilega helsjúkur.