Þegar hann var fyrir dómi bar kona að nafni Carole-Ann Boone vitni. Þegar hún sat í vitnastúkunni í Flórída bar Bundy upp bónorð sem hún tók. Gloppa í lögum Flórídaríkis gerði það að verkum að bónorðið og samþykkt þess jafngilti hjónabandi þrátt fyrir að margir hafi neitað að sætta sig við það.
Mál Ted Bundy hefur vakið athygli á nýjan leik undanfarið eftir að Netflix hóf sýningar á heimildamyndinn The Ted Bundy Tapes. Carole-Ann kemur þar við sögu enda erfitt að sneiða hjá henni þar sem þau voru gift. Því hefur verið velt upp hvort hún hafi aðstoðað Bundy við að flýja úr fangelsi en honum tókst tvisvar að flýja og halda morðæði sínu áfram á meðan hann gekk laus.
Þegar ákæra á hendur Bundy fyrir að hafa myrt hina 12 ára gömlu Kimberly Leach var tekin fyrir árið 1980 var Carol-Ann eina vitnið sem vitnaði Bundy í hag en hann varði sig sjálfur í þeim réttarhöldum. Þá hafði Bundy verið dæmdur til dauða fyrir Chi Omega morðin. Þau framdi hann í janúar 1978 þegar hann myrti Margaret Bowman og Lisa Levy.
Þrátt fyrir þetta varði Carol-Ann hann og bar honum góða sögu. Hún sagði kviðdómi að hún hefði aldrei séð neitt í fari Bundy sem benti til hvatar til að vinna öðrum mein.
„Hann er stór hluti af lífi mínu. Hann er mér mikilvægur.“
Sagði hún.
En eitthvað virðist ánægja Carol-Ann með Bundy hafa dvínað með tímanum því 1986 skildi hún við hann en þá höfðu þau eignast dóttur. Eftir skilnaðinn lét hún sig hverfa með stúlkuna og hóf nýtt líf og vildi ekki tengja sig á neinn hátt við Bundy og hræðilega glæpi hans. Engar upplýsingar liggja opinberlega fyrir um hvar þær mæðgur eru enda vilja þær ekki að nein athygli beinist að þeim og lái þeim hver sem vill.
