Breski framhaldsþátturinn Foster læknir, sem sýndur er á RÚV, er afbragðs sjónvarpsefni. Bretar sátu límdir við skjáinn meðan á sýningum þáttarins stóð – og maður skilur alveg af hverju. Þarna kynnumst við Gemmu Foster lækni, sem fer að gruna að maður hennar haldi framhjá henni. Suranne Jones leikur Gemmu og hlaut ýmis verðlaun fyrir leik sinn, þar á meðal BAFTA. Hún er aldeilis frábær í hlutverki konu sem sér veröld sína hrynja, túlkar varnarleysi, reiði og vonbrigði gríðarlega vel.

Búið er að sýna tvo þætti af fimm og þar hafa sannarlega verið eftirminnileg atriði. Eins og þegar Gemma komst að því hver hjákona manns síns er, en sú uppljóstrun kom örugglega flestum áhorfendum jafnmikið á óvart og henni. Atriðið þegar hún gaf eiginmanni sínum færi á að játa framhjáhaldið, sem hann gerði ekki, var afar áhrifamikið. Þetta er þáttur sem auðvelt er að lifa sig inn í. Handritið er einstaklega gott og stjörnuleikur Suranne Jones gerir að verkum að áhorfandinn getur ekki annað en látið sér annt um persónu hennar. Reyndar óttast maður að Gemma muni grípa til óskynsamlegra ráða í erfiðri stöðu, hún er í svo miklu tilfinningalegu uppnámi að hún á erfitt með að hugsa skýrt.

Bretar eru að gera aðra þáttaröð af Foster lækni sem bendir til þess að endir þessarar þáttaraðar verði opinn og bjóði upp á ýmsa möguleika. Þá er bara að horfa á þá næstu. Við treystum á Skarphéðin dagskrárstjóra!