Sterkum grænum leisergeisla var beint að umferð í Reykjanesbæ um helgina. Geislanum var meðal annars beint að bifreið lögreglumanns sem var á ferðinni og lék enginn vafi á hvaðan geislinn kom.

Þetta kemur fram í tilkynningu frá lögreglunni á Suðurnesju,. Lögregla ræddi við húsráðendur í viðkomandi húsi og kom þá í ljós að fjögurra ára sonur þeirra hafði verið að leika sér með leiserbendilinn í glugganum um kvöldið. Fólkinu var tjáð að styrkur bendilsins væri það mikil að geislinn gæti beinlínis verið hættulegur. Fólkið bað lögreglu að taka hann og farga honum.

Lögreglan á Suðurnesjum ítrekar varnaðarorð sín vegna þeirrar hættu sem skapast getur ef leisergeislum er beint að umferð á landi eða í lofti.