Fimm undirverktakar hjá Strætó bs. telja sig hafa orðið fyrir verulegu fjárhagstjóni og muni verða fyrir frekara tjóni vegna ítrekaðs framsals á samningi um ferðaþjónustu fatlaðra hjá Strætó. Verktakarnir telja að framsal á samningi úr þrotabúi Prime Tours til Far-vel á dögunum sé ólögmætt og skaðabótaskylt á sama hátt og þegar samningurinn var framseldur frá Kynnisferðum til Prime Tours.

Fréttablaðið skýrir frá þessu. Fram kemur að verktakarnir fimm telji sig hafa orðið af hundruðum milljóna vegna þessa. Þeir unnu að hluta til mál fyrir kærunefnd útboðsmál 2015 vegna rammasamnings sem var framseldur frá Kynnisferðum til félags sem fékk síðar nafnið Prime Tours. Kærunefndin komst að þeirri niðurstöðu að Strætó væri skaðabótaskylt gagnvart kærendum vegna ólögmæts framsals á samningnum.

Fréttablaðið segir að þrátt fyrir útskýringar skiptastjóra Prime Tours ehf í Fréttablaðinu um að eðlileg viðskipti hafi verið að ræða með eignir þrotabúsins og ekki hafi verið um kennitöluflakk að ræða segja verktakarnir berum orðum að kennitöluflakk eigi við í þessu máli.

„Við teljum þetta bera skýrt og augljóst merki um kennitöluflakk sem gerir þetta framsal til Far-vel einnig ólögmætt og skaðabótaskylt.“

Ef haft eftir þeim.