Ferðasíðan Lonely Planet er búin að birta lista yfir bestu, nýju matarupplifanirnar fyrir ferðalanga árið 2019. Veitingastaðurinn Moss Restaurant í Bláa lóninu kemst á blað, ásamt heimsþekktum veitingastöðum eins og Noma í Kaupmannahöfn og Dine in the Dome í Singapúr.
Í grein Lonely planet er sagt að Moss restaurant sé heitur reitur fyrir matgæðinga þar sem hægt er að gæða sér á íslenskum réttum með útsýni yfir hraunið. Þá er einnig minnst á vínkjallarann sem er umlukinn hrauni frá árinu 1226 en þeir sem hætta sér þangað ferðast í raun undir yfirborð jarðar.
Basalt arkitektar og ítalska fyrirtækið Design Group Italia sáu um hönnun Moss restaurant sem opnaði síðasta vor. Þess má geta að Basalt arkitektar hlutu Hönnunarverðlaun Íslands 2018 fyrir arkitektúr í íslenskri baðmenningu. Ekki þarf að fjölyrða um vinsældir Bláa lónsins, en erlendum gestum baðstaðarins hefur fjölgað gríðarlega síðustu misseri.
