Ef marka má frétt í New York Post í dag verður bráðlega hægt að kaupa sér McDonald´s hamborgara á Íslandi aftur. Í kjölfar efnahagshrunsins 2008 fór kostnaður upp úr öllu valdi hjá útibúi McDonald´s keðjunnar á Íslandi og starfseminni var hætt. Síðasti McDonald´s hamborgarinn var settur á grillið árið 2009. Í greininni er rætt um uppganginn í íslensku efnahagslífi undanfarin ár, sérstaklega í ferðamannaiðnaðinum. Rætt er við Sigurð Hannesson, framkvæmdastjóra Samtaka iðnaðarins, og greint frá mikilli uppbyggingu hótela á Íslandi og aukinni erlendri fjárfestingu.
Undir lok greinarinnar segir að Íslendingar megi vænta þess að sjá nokkra McDonald´s staði rísa á ný á Íslandi. Ekki er nánar greint frá því hverjir standa að baki þeim áformum af hálfu Íslendinga.
