Stúlkan hjá brúnni, ný bók Arnaldar Indriðasonar, kemur í sölu í dag, en Arnaldur hefur gert það að hefð að gefa bækur sínar út á þeim degi.

Fljótlega mun fimmhundruð þúsundasta eintakið af bókum Arnaldar á Íslandi. Af því tilefni efnir Forlagið til leiks, í því tiltekna eintaki, því fimmhundruð þúsundasta selda, verður að finna gullmiða sem er ávísun á lúxusgistingu á Tower Suites í Borgartúni, máltíð á Skelfiskmarkaðnum og miða í Þjóðleikhúsið, allt fyrir tvo.

„Þau merku tíðindi munu eiga sér stað í byrjun nóvember að fimmhundruð þúsundasta eintakið af bók eftir Arnald mun seljast á Íslandi, en hann hefur þó selt á heimsvísu um 14 milljónir eintaka,“ segir Egill Örn Jóhannsson, framkvæmdastjóri Forlagsins.

Arnaldur hefur einokað toppsæti bóksölulista undanfarinna ára með glæpasögum sínum, í fyrra var Myrkrið á toppnum.

Eldri hjón eru áhyggjufull vegna dótturdóttur sinnar. Þau vita að hún hefur verið að smygla fíkniefnum og nú er hún týnd svo þau leita til Konráðs, fyrrverandi lögreglumanns, sem þau þekkja af afspurn. Konráð er með hugann við annað og stöðugt að grufla í örlögum föður síns sem var stunginn til bana fyrir mörgum áratugum. En þegar kafað er ofan í fortíðina kemur fleira í ljós en leitað var að og lítil stúlka sem drukknaði í Reykjavíkurtjörn fangar óvænt athyglina.

Stúlkan hjá brúnni er snjöll og nístingsköld saga um brostnar vonir og börn sem eiga sér hvergi skjól.

Arnaldur Indriðason hefur skrifað á þriðja tug glæpasagna sem allar hafa notið mikilla vinsælda heima og erlendis. Bækur hans hafa verið þýddar á um fjörutíu tungumál og miljónir eintaka selst um víða veröld, þar af um hálf miljón á Íslandi sem er einstakur árangur. Arnaldur hefur jafnframt hlotið fjölda verðlauna og viðurkenninga fyrir skáldsögur sínar.