Maður á þrítugsaldri féll niður af svölum á þriðju hæð í fjölbýlishúsi á Akureyri aðfaranótt sunnudags. Hann slasaðist töluvert, enda fallið hátt, og var í framhaldinu fluttur á slysadeild.

RÚV greindi fyrst frá. Þar segir að maðurinn hafi ætlað að koma vinkonu sinni, sem var læst úti og býr á þriðju hæð, til aðstoðar.

Hann klifraði ofan af svölum á fjórðu hæð, niður á þá þriðju til að opna svaladyrnar. Klifrið fór ekki betur en svo að hann missti takið og féll niður á lóðina.

Samkvæmt lögreglunni á Akureyri var maðurinn fluttur á sjúkrahús með lærbeinsbrot og mögulega fleiri beinbrot.