Pétur G. Broddason rekstraraðili meðferðarheimilisins að Laugalandi í Eyjafirði hefur greitt sér 42 milljónir króna í arð úr félaginu á síðustu árum. Meðferðarheimilið að Laugalandi er ætlað stúlkum á aldrinum 13 – 18 ára og þar dvelja að jafnaði sex til sjö stúlkur hverju sinni. Einu tekjur heimilisins koma úr ríkissjóði. Það er Fréttablaðið sem greindi frá þessu í morgun.

Pétur tók við rekstri meðferðarheimilisins þann 1. nóvember 2007. Á Laugaland fer fram sérhæfð meðferð fyrir stúlkur með alvarlega hegðunarröskun og stúlkur í vímuefnaneyslu.Pétur vildi lítið tjá sig um málið þegar Fréttablaðið leitaði svara. „Þú verður bara að spyrja Barnaverndarstofu að því. Ég rek fyrirtækið undir yfirstjórn hennar þannig að ég vísa því bara þangað. Allir ársreikningar mínir fara þangað,“ sagði Pétur.

Ásmundur Einar Daðason, velferðarráðherra segir í samtali við Fréttablaðið að gott orð fari af úrræðinu á Laugalandi en segir óeðlilegt að verið sé að greiða arð út úr starfsemi sem þessari. „Það er ekki eðlilegt að menn séu að greiða sér háan arð úr svona fyrirtækjum. Það er ekki markmið ríkissjóðs að einstaklingar þéni á úrræðum. Það er markmið ríkissjóðs að við veitum góð úrræði,“ sagði Ásmundur.