Heimsleikarnir í CrossFit hefjast í Madison í Wisconsin-fylki í dag en Ísland sendir fimm keppendur til leiks á leikana í ár. Raunir dagsins eru nokkuð fjölbreyttar og innihalda bæði hjólreiðar og lyftingar. Deginum lýkur svo á því að keppendur þurfa að róa 42,2 kílómetra á róðravél.
Eins og áður segir eigum við Íslendingar fimm keppendur á mótinu í ár, fjóra í kvennaflokki og einn í karlaflokki. Reynsluboltarnir Annie Mist Þórisdóttir, Katrín Tanja Davíðsdóttir og Ragnheiður Sara Sigmundsdóttir verða að sjálfsögðu á sínum stað en auk þeirra tekur Oddrún Eik Gylfadóttir þátt í fyrsta sinn á leikunum í einstaklingsflokki. Oddrún hefur einu sinni áður keppt á leikunum en þá tók hún þátt í liðakeppni.
Allar íslensku stelpurnar ætla sér stóra hluti á leikunum en bæði Katrín Tanja Davíðsdóttir og Annie Mist Þórisdóttir hafa sigrað mótið áður. Þá hefur Ragnheiður Sara Sigmundsdóttir oftar en ekki blandað sér í baráttu um verðlaunasæti.
Í karlaflokki er Björgvin Karl Guðmundsson eini íslenski þátttakandinn í ár en hann er reynslubolti í íþróttinni og ætlar sér án efa stóra hluti. Björgvin tekur nú þátt á sínum fimmtu heimsleikum en hann hefur best náð þriðja sæti.
Nánari upplýsingar og beina útsendingu frá mótinu má finna á heimasíðu mótsins. Games.crossfit.com
