Heimir Hallgrímsson hefur ákveðið að hann muni ekki halda áfram með íslenska karlalandsliðið í knattspyrnu.
Heimir hefur undanfarin sjö ár verið partur af landsliðinu og verið aðalþjálfari síðustu fimm árin.
Heimir útskýrði það á blaðamannafundi í dag af hverju hann hefði ákveðið að stíga til hliðar þrátt fyrir mjög gott samstarf.
,,Af hverju ertu að hætta ef allt er svona frábært? Það hljómar eins og þetta sé besta starf í heimi, ég er með stuðningsmennina í liði, fjölmiðlamenn eru með okkur í liði,“ sagði Heimir.
,,Ég lít á þetta þannig að sjö ár eru langur tími, sérstaklega þegar þú ert að vinna í jafn fastheldnu umhverfi og við höfum verið að vinna í núna.“
,,Ef ég væri áfram þá myndi ég sennilega halda áfram með sömu áherslur. Það kemur þreyta í allt samstarf.“
,,Það er líka hollt fyrir hópinn í þessu fastmóta umhverfi að fá nýja rödd og nýja sýn og einhvern sem hrisstir upp í hlutunum. Það er ástæðan fyrir því að það sé gott fyrir mig og liðið að stíga til hliðar.“
