„Aukin notkun snjalltækja er að ýmsu leyti jákvæð en hún hefur einnig hættur í för með sér fyrir íslenskuna“ segir Sigríður Sigurjónsdóttir prófessor í íslensku í grein sem birtist á Hugrás vefriti Hugvísindasviðs Háskóla Íslands. Sigríður og Eiríkur Rögnvaldsson prófessor fengu styrk frá Rannsóknarsjóði til að kanna stöðu íslenskunnar í stafrænu umhverfi. Fréttablaðið fjallaði um málið í morgun.

Sigríður segir í grein sinni að snjalltækjaþróun undanfarinna ára sé að mörgu leyti jákvæð. Til dæmis bendi ýmislegt til að notkun snjalltækja örvi sköpunargáfu og ímyndunarafl barna. Aftur á móti hafi mikil breyting orðið á samskiptum fólks með tilkomu stafrænna miðla og snjalltækja. Mikil notkun tækjanna hafi veruleg áhrif á samverustundir fjölskyldna. Sigríður bendir á að við mikla notkun snjalltækja dragi verulega úr mállegum samskiptum sem getur hindrað málþroska barna.

Eiríkur segir í samtali við fréttablaðið það vera tilfinningu margra að áhrif tækni og snjalltækja séu mikil á máltöku. Þó séu ekki til neinar rannsóknir um það. Eiríkur segir að til að börn læri tungumál þurfi ákveðið mikið áreiti á því tungumáli. Hann bendir á þegar börn sem horfa mikið á myndbönd á Youtube eða spili gagnvirka tölvuleiki hafi enska mikil áhrif á þau.

Samkvæmt Saft könnun frá árinu 2013 sem rannsakaði netnotkun barna og unglinga kom í ljós að 62% íslenskra barna byrja að nota netið á aldrinum fimm til átta ára, niðurstöðurnar sýna einnig að sífellt fleiri börn byrja að nota internetið yngri en fimm ára. Það sem netnotkun fer oftast fram á ensku er líklegt að hún hafi mikil áhrif á yngstu málnotendurna, en börn eru móttækilegust fyrir máli fyrstu sex til níu árin.

Sigríður segir framtíð íslenskunnar undir máltöku barna komna. Það sé því ljóst að til að styrkja stöðu íslenskunnar sé nauðsynlegt að hugsa að málumhverfi barna á máltökualdri.