Leikarinn og söngvarinn Helgi Björnsson fagnar stórafmæli í dag, en hann er sextugur.

Í myndbandinu hér fyrir neðan má sjá nokkra af vinum Helga óska honum til hamingju með daginn, þar á meðal Andreu Róberts, Sóla Hólm, Högni, Andri Freyr Viðarsson og fleiri.

Í tilefni af afmælinu blæs Helgi til glæsilegra stórtónleika í Laugardalshöllinni laugardaginn 8. september næstkomandi. Á meðal söngvara sem stíga á svið með Helga eru Emmsjé Gauti, Högni og Ragga Gísla.

Helgi hefur átt gifturíkan feril sem söngvari, leikari og athafnamaður.  Hann hefur leitt hljómsveitir eins og Grafík, SS Sól, Reiðmenn vindanna og Kokteilpinnana; gefið út tónlist með þessum sveitum og í eigin nafni og er fyrir löngu orðinn samofinn þjóðarsálinni með lögum sínum og textum.