Argentínumenn eru með elsta liðið í lokakeppni HM líkt og árið 2014. Helmingur leikmannahópsins er að minnsta kosti 30 ára og þriggja mánaða. Þetta er meðal þess sem lesa má út úr gögnum sem allar þátttökuþjóðir lokakeppninnar hafa skilað inn til FIFA.

Á eftir Argentínu yfir elstu þjóðirnar eru Panama og Kosta Ríka en yngsti leikmannahópurinn er sá franski. Þar er miðgildið 25 ár og tveir mánuðir en hjá Englendingum er það 25 ár og fimm mánuðir. Íslenski hópurinn er í hópi þeirra elstu en íslensku strákarnir eru líka í hópi þeirra sem eiga flesta landsleiki að baki eins og sjá má á myndinni hér að neðan.

Athygli vekur að þó svo að argentínski hópurinn sé sá elsti er hann einnig einn sá óreyndasti. Hver leikmaður í hópnum á aðeins tíu landsleiki að baki að jafnaði. Hafa ber í huga að í hópnum eru einnig mjög reyndir leikmenn. Lionel Messi á 124 landsleiki að baki og Javier Mascherano 143. Þar á eftir koma til dæmis Angel Di Maria (94) Sergio Aguero (85) og Gonzalo Higuain (71).

Elsti leikmaður keppninnar er Essam Al-Hadary, markvörður Egypta, en hann er 45 ára. Hann er einnig sá leikmaður sem á flesta landsleiki að baki, eða 157.

Þá vekur það athygli að flestir leikmenn keppninnar eru fæddir í stysta mánuði ársins, febrúar. 81 leikmaður er fæddur í febrúar, 75 í mars og 74 í janúar. Rennir þetta enn frekari stoðum undir þá kenningu að íþróttamenn sem fæddir eru fyrri hluta árs eiga betri möguleika en þeir sem eru fæddir seinni hluta árs að ná langt á sviði íþrótta. Fæstir eru fæddir í nóvember og desember, eða 35 og 43.