Rúnar Alex Rúnarsson, landsliðsmarkvörður, mun ræða við Guðmund Benediktsson í kvöld í sjónvarpsþættinum Fyrir Ísland.

Markverðir verða teknir fyrir í þætti kvöldsins en Rúnar Alex verður partur af íslenska hópnum á HM í sumar.

Saga Rúnars er athyglisverð en hann er sonur Rúnars Kristinssonar sem var frábær miðjumaður á sínum tíma.

Rúnar segir það galið að vera markmaður en hann byrjaði í marki eftir botnlangakast í fjórða bekk er hann bjó í Belgíu.

,,Það er fáránlegt. Þegar ég eignast börn þá vona ég að hann verði ekki markmaður,“ sagði Rúnar.

,,Ég fékk botnlangakast í fjórða bekk og á þeim tíma hætti markmaðurinn okkar í liðinu. Ég hafði oft verið að leika mér í marki og þjálfarinn spurði hvort ég vildi prófa að vera í marki í einhvern tíma því þeim vantaði markmann.“

,,Mamma segir að ég hafi verið efins um það en út af því að ég var meiddur og veikur á undan þá fannst mér ég hafa misst svo mikið af líkamlegum styrk og þá hafi ég ákveðið að prófa að vera áfram í marki í einhvern tíma og það var svo gaman að ég hélt áfram.“