Lögreglan í Nottinghamshire á Englandi hefur hafið morðrannsókn eftir að 26 ára gamall knattspyrnumaður lést af sárum sínum nokkrum dögum eftir að ekið var á hóp gangandi vegfarenda í bænum Arnold.

Tyler Fairman varð fyrir bílnum ásamt fjórum öðrum skömmu eftir klukkan eitt aðfaranótt laugardags. Hann var fluttur á sjúkrahús með lífshættulega áverka en lést á þriðjudag. Hinir fjórir slösuðust minna alvarlega.

Duane Anthony, sem er 40 ára, hefur verið ákærður fyrir fimm tilraunir til manndráps, auk fleiri umferðarlagabrota. Eftir andlát Fairman hefur rannsókn málsins nú verið breytt í morðrannsókn.

Fairman lék með utandeildarliðinu Woodthorpe Park Rangers og staðfesti félagið að tveir leikmenn og einn þjálfari hefðu orðið fyrir bílnum.

Lögreglan hefur jafnframt hvatt fólk til að eyða myndböndum af atvikinu sem hafa farið í dreifingu á samfélagsmiðlum svo fjölskylda Fairman fái frið til að syrgja.