Florentino Perez gæti fengið alvöru mótframboð í forsetakosningum Real Madrid, en auðkýfingurinn Enrique Riquelme segist klár í slaginn.

Perez tilkynnti á óvæntum blaðamannafundi á þriðjudag að hann hefði boðað forsetakosningar hjá félaginu, þrátt fyrir að hafa verið endurkjörinn án mótframboðs fyrr á þessu ári. Vildi hann að þeir sem gagnrýndu hann myndu reyna að bjóða honum birginn.

Samkvæmt spænskum miðlum hefur Riquelme, sem er forstjóri orku- og vatnsfyrirtækisins Grupo Cox, þegar fjármagnað hugsanlegt framboð. Þá er fyrrverandi markvörður Real Madrid, Iker Casillas, sagður hluti af hans teymi.

Perez hefur verið forseti Real í samtals 23 ár og enginn hefur boðið sig fram gegn honum síðan hann sneri aftur árið 2009. Ástæðan er meðal annars sú að frambjóðendur þurfa að leggja fram gríðarlega háa tryggingu, um 190 milljónir evra samkvæmt spænskum fjölmiðlum.